चंपाषष्ठी निमित्ताने खंडोबा रायांची सासुरवाडी असलेल्या नेवासा बुद्रुक येथे यात्रा भरत असून मंदिर जीर्णोद्धार झाल्याने नव्याने बांधण्यात आलेल्या मंदिरामध्ये नवीन मूर्तीची प्राणप्रतिष्ठा दि.२ डिसेंबर रोजी करण्यात येणार असल्याची माहिती मंदिर व्यवस्थापक प्रा.डॉ.मुरलीधर कराळे यांनी दिली.चंपाषष्ठी निमित्ताने खंडोबा म्हाळसा मंदिरावर केलेली विद्युत रोषणाई भाविकांचे आकर्षण ठरत आहे.
श्री क्षेत्र देवगडचे महंत गुरुवर्य भास्करगिरी बाबांच्या प्रेरणेने नेवासा बुद्रुक येथे नव्याने बांधण्यात आलेल्या खंडोबा म्हाळसादेवी मंदिराचे बांधकाम पूर्ण झाले असून चंपाषष्ठीच्या दिवशी दि.२ डिसेंबर रोजी खंडोबा म्हाळसा देवीसह,त्रैलोक्य स्वामी नारद मुनी, सच्चिदानंद बाबांच्या मूर्ती प्राणप्रतिष्ठापणा होणार आहे यानिमित्त यावर्षी अखंड हरिनाम सप्ताहाचे आयोजन करण्यात आले होते.या अखंड हरिनाम सप्ताहामध्ये पहाटे काकडा भजन, सकाळी ६ ते ७ यावेळेत विष्णू सहस्त्रनाम,सकाळी ७ ते ११ ग्रंथराज ज्ञानेश्वरीचे पारायण दुपारी १२ ते २ भोजन महाप्रसाद, सायंकाळी ५ ते ६ हरिपाठ, सायंकाळी ७ ते ९ हरिकीर्तनाचे कार्यक्रम उत्साहपूर्ण वातावरणात पार पडले.
आज सोमवार दि.२ डिसेंबर रोजी चंपाषष्ठीच्या दिवशी खंडोबा म्हाळसादेवी व सच्चिदानंद बाबांच्या मूर्तीची प्राणप्रतिष्ठापणा होऊन महाराष्ट्रातील प्रसिद्ध कीर्तनकार हभप मीराबाई महाराज मिरीकर यांच्या होणाऱ्या काल्याच्या किर्तनाने या सोहळ्याची सांगता होणार आहे.चंपाषष्ठी निमित्ताने होणाऱ्या कालाकीर्तन कार्यक्रमाचा भाविकांनी लाभ घ्यावा असे आवाहन खंडोबा म्हाळसादेवी मंदिराचे व्यवस्थापक प्रा.डॉ.मुरलीधर कराळे व नेवासा बुद्रुक ग्रामस्थ यांनी केले आहे.
Post a Comment