नेवासा, प्रतिनिधी
नेवासा येथील ज्ञानमाऊली चर्च प्रांगणात असलेल्या मतमाऊली यात्रेनिमित्त नेवासा शहरात मिरवणूक काढण्यात आली या मिरवणुकीचे सर्वंधर्मीय बांधवांच्या वतीने उत्स्फूर्त स्वागत करण्यात
आले.शनिवारी दि.३० नोव्हेंबर रोजी झालेल्या यात्रेनिमित्ताने नेवासकर नागरिकांनी ख्रिस्ती बांधवांना शुभेच्छा दिल्या.
शनिवारी दि.३० नोव्हेंबर रोजी झालेल्या मतमाऊली यात्रेनिमित्त सकाळी ९ ते दुपारी ३ यावेळेत आराधना व आरोग्य दानाची प्रार्थना करण्यात आली.या प्रार्थना सभेत आजारी असलेल्या व दुःखी कष्टी लोकांसाठी प्रार्थना करण्यात आली.सायंकाळी ४ वाजता पवित्र मतमाऊली मातेच्या प्रतिमेची मिरवणूक काढण्यात आली.ज्ञानमाऊली मंदिर चर्च पासून फादर प्रकाश राऊत यांच्या मार्गदर्शनाखाली प्रारंभ झाला या मिरवणुकीत महिला व पुरुष भाविकांनी प्रभू येशू ख्रिस्त व पवित्र मारिया मातेची भजने गायली. मिरवणुकीचा समारोप ज्ञानमाऊली चर्च प्रांगणात झाल्यानंतर सायंकाळी ७ वाजता नाशिक धर्मप्रांताचे प्रमुख रेव्हरंट बिशप लुर्ड्स डॅनियल व नाशिक येथील व्हीकर जनरल यांच्या प्रमुख उपस्थितीत यात्रेची पवित्र मिस्सा बलिदान हा धार्मिक विधी झाला
यात्रेनिमित्त अनेकांनी येथे येऊन बिशप लुर्ड्स डॅनियल व नाशिक येथील व्हीकर जनरल फादर प्रकाश राऊत यांचा सत्काराद्वारे गौरव केला.
सर्वांच्या सुखकरिता व चांगल्या आरोग्य व देशाच्या एकता व अखंडतेसाठी ही यावेळी प्रमुख धर्मगुरूंनी प्रार्थना केली.उपस्थित भाविकांना महाप्रसादाचे वाटप करण्यात आले.उपस्थित भाविकांनी मतमाऊली यात्रेच्या निमित्ताने मतमाऊलीच्या डोंगरावर जाऊन दर्शन घेतले तसेच मेणबत्या जाळून मतमाऊलीला प्रार्थना केली. यात्रेनिमित्त दि.२७ नोव्हेंबर ते २९ नोव्हेंबर या तीन दिवस चाललेल्या त्रिदिनी भक्ती सोहळयाला भाविकांनी सहभाग नोंदवून प्रतिसाद दिला.रविवारी दि.१ डिसेंबर रोजी फादर प्रकाश राऊत यांच्या उपस्थितीत झालेल्या पवित्र मिस्सा बलिदानाच्या धार्मिक विधीने यात्रा सोहळयाची सांगता करण्यात आली.
Post a Comment