नेवासा, प्रतिनिधी
भू-लोकीचा स्वर्ग अशी ओळख असलेल्या नेवासा तालुक्यातील श्री क्षेत्र देवगड येथील श्री दत्तजयंती सोहळयास दि.५ डिसेंबर पासून प्रारंभ होत असून दि.१२ डिसेंबर पर्यंत चालणाऱ्या या श्री दत्तजन्म उत्सव सोहळयाची श्री क्षेत्र देवगड येथे जय्यत तयारी सुरू झाली आहे.या सोहळ्यात विविध धार्मिक कार्यक्रमाचे आयोजन करण्यात आले असून श्री दत्तजन्माचा मुख्य सोहळा बुधवार दि.११ डिसेंबर रोजी सायंकाळी ६ वाजता साजरा होणार असल्याची माहिती गुरुवर्य भास्करगिरी महाराज यांनी दिली.
श्री क्षेत्र देवगड येथील श्री गुरुदेव दत्त पिठाचे निर्माते श्री समर्थ सदगुरू किसनगिरी बाबांच्या कृपा आशीर्वादाने सुरू झालेल्या व महाराष्ट्रासह देशामध्ये प्रसिद्ध झालेल्या श्री दत्त जन्माचा सोहळा हा वैभवशाली पद्धतीने देवगड येथे गुरुवर्य भास्करगिरी महाराज यांच्या मार्गदर्शनाखाली साजरा केला जातो.
यावर्षी या सोहळयास गुरुवार दि.५ डिसेंबर पासून सुरुवात होत आहे यानिमित्ताने पहाटे ४ ते ४.३० मंगल वाद्य सनई, चौघडा वादन,४.३० ते ६.३० काकडा भजन व श्रींची प्रात:आरती,सकाळी ६.३० ते ७.३० दर्शन प्रदक्षिणा ७.३० ते ८.३० गीतापाठ व विष्णू सहस्त्रनाम,९ ते ११ सामुदायिक ज्ञानेश्वरी पारायण,दुपारी १ ते ३ यावेळेत
समयानुसार आलेल्या गुणवंतांचे कार्यक्रम, तसेच ३ ते ५ यावेळेत पुन्हा सामुदायिक ज्ञानेश्वरी पारायण, सायंकाळी ५ ते ७ यावेळेत हरिपाठ व श्रींची सायंम आरती दर्शन, तर रात्री ८.३० ते १०.३० यावेळेत कीर्तन होणार असून त्यामध्ये खोकर येथील हभप सेवानाथ महाराज,आळंदी येथील हभप श्रीनिवास महाराज,माऊली महाराज कदम, नेवासा येथील संत ज्ञानेश्वर महाराज संस्थानचे हभप शिवाजी महाराज देशमुख,वारकरी शिक्षण संस्था आळंदी येथील हभप चंदीले नाना महाराज,परळी येथील हभप केशव महाराज उखळीकर यांच्या कीर्तनांचा यात समावेश आहे.
बुधवार दि.११ डिसेंबर रोजी सायंकाळी ६ वाजता देवगडच्या मंदिर प्रांगणात भगवान दत्तात्रयांचा दत्त जन्म सोहळा हजारो भाविक व संत महंतांच्या उपस्थितीत व प्रवरामाईच्या साक्षीने साजरा होणार आहे गुरुवारी दि.१२ डिसेंबर रोजी सकाळी ८ ते १० यावेळेत गुरुवर्य भास्करगिरी महाराज यांच्या होणाऱ्या काल्याच्या कीर्तनाने आठ दिवस चाललेल्या श्री दत्तजन्म उत्सव सोहळयाची सांगता होणार आहे.यानिमित्ताने भाविकांनी कीर्तन श्रवणाचा व होणाऱ्या धार्मिक कार्यक्रमाचा लाभ घ्यावा असे आवाहन गुरुवर्य भास्करगिरी महाराज यांनी केले आहे.
चौकट:-दत्तजयंती सोहळयाची जय्यत तयारी सुरू
आठ दिवस चालणाऱ्या श्री दत्त जयंती सोहळयाची मंदिर प्रांगणात जय्यत तयारी गुरुवर्य भास्करगिरी महाराज यांच्या मार्गदर्शनाखाली सुरू असून आदी धार्मिक कार्यक्रम जेथे होणार आहे तो ज्ञानसागर सभामंडप सुशोभित करण्यात आला आहे.मंदिर प्रांगणाबाहेर यात्रेनिमित्त येणाऱ्या अनेक दुकानदारांना जागेची व्यवस्था करून उपलब्ध करून देण्यात आली आहे.मंदिर परिसर मंगलमय होण्यासाठी परिसर देखील सुशोभीकरण करण्याचे काम हाती घेण्यात आले आहे.
Post a Comment