शिंदेवस्ती शाळेत संविधान दिन उत्साहात साजरा

चांदेकसारे(वार्ताहर)  

पोहेगाव  जि.प.प्राथ.शाळा शिंदेवस्ती नवीन येथे भारतीय संविधान दिन मोठ्या उत्साहात साजरा करण्यात आला.यावेळी विद्यार्थ्यांनी प्रभात फेरी काढून संविधानाविषयी जागृती केली.या निमित्ताने शाळेत वकृत्व स्पर्धा,घोषवाक्य स्पर्धा आयोजित करण्यात आल्या.कार्यक्रमाच्या सुरवातीला २६/११ च्या दहशतवादी हल्ल्यात वीरगती प्राप्त झालेल्या शहिदांना श्रद्धांजली अर्पण करण्यात आली.कार्यक्रमच्या अध्यक्षस्थानी शिर्डीचे पोलिस उपनिरीक्षक बारकू जाने होते.यावेळी प्रमुख पाहुणे म्हणून पोलिस अधिकारी राठोड, रविंद्र मोकळ, केंद्रप्रमुख आर. के.ढेपले उपस्थित होते.संविधानाचे शिल्पकार डॉ.बाबासाहेब आंबेडकरांच्या प्रतिमेचे व संविधानाच्या प्रतीचे पूजन करण्यात आले. यावेळी सर्व विद्यार्थी व प्रमुख पाहुण्यांनी संविधानाच्या उद्देशिकेचे सामुदायिक वाचन केले. शिक्षक सचिन आढांगळे यांनी भारतीय संविधानाविषयी माहिती सांगितली.यावेळी विध्यार्थीनी अक्षदा डांगे, सृष्टी जाधव,प्रिया देशमुख,श्रद्धा पेटारे,भारती मोरे यांनी भारतीय संविधान या विषयावर भाषणे केली. याप्रसंगी रविंद्र मोकळ यांनी शाळेला संविधान ग्रंथाची प्रत व बारकू जाने यांनी संविधान प्रास्ताविकेची फ्रेम शाळेस भेट दिली.यावेळी शालेय व्यवस्थापनचे उपाध्यक्ष नानासाहेब शिंदे,बाळासाहेब गडाख,विजय देशमुख,साईनाथ गायकवाड तसेच दिप्ती मोरे,अंगणवाडी सेविका मंगल देशमुख,संगीता औताडे आदी उपस्थित होते. कार्यक्रमाचे सूत्रसंचालन विद्यार्थीनी अक्षदा डांगे हीने करून सचिन आढांगळे यांनी आभार मानले.