गुरुवर्य भास्करगिरी बाबांच्या हस्ते शुभारंभ करून नेवासा शहरात अखंड हरिनाम सप्ताहास उत्साहात प्रारंभ

जीवनात जगावं कसं हे कळण्यासाठी ज्ञानेश्वरीचे वाचन करा-गुरुवर्य भास्करगिरी महाराज

नेवासा, प्रतिनिधी

नेवासा शहरातील मारुती चौकामध्ये गावकऱ्यांच्या वतीने आयोजित अखंड हरिनाम सप्ताहास श्री क्षेत्र देवगडचे महंत गुरुवर्य भास्करगिरी बाबांच्या हस्ते ध्वजारोहण करून बुधवारी दि.२७ नोव्हेंबर पासून उत्साहात प्रारंभ झाला.जीवनात जगावं कसं व ज्ञानेश्वरीचे ज्ञान कळण्यासाठी ज्ञानेश्वरी ग्रंथाचे वाचन करा असे आवाहन यावेळी गुरुवर्य भास्करगिरी महाराज यांनी यावेळी बोलताना केले.

          नेवासा खुर्द येथील मारुती चौकामध्ये श्री हनुमान भजनी मंडळ व ग्रामस्थ यांच्या संयुक्त विद्यमाने आयोजित अखंड हरिनाम सप्ताह व ग्रंथराज ज्ञानेश्वरी पारायण सोहळयाच्या शुभारंभ प्रसंगी गुरुवर्य भास्करगिरी बाबांच्या हस्ते धर्मध्वजपूजन करण्यात आले त्यानंतर संत ज्ञानेश्वर महाराजांच्या प्रतिमेस पुष्पहार घालून या सोहळयाचा शुभारंभ करण्यात आला.

     यावेळी झालेल्या कार्यक्रमाप्रसंगी गुरुवर्य भास्करगिरी महाराजांच्या समवेत ह.भ.प.उद्धव महाराज मंडलिक, ह.भ.प.नंदकिशोर महाराज खरात,पारायण व्यासपीठ चालक विजय महाराज पवार,सचिन महाराज पवार, उपनगराध्यक्ष नंदकुमार पाटील,व्यापारी सूर्यकांत रासने यावेळी व्यासपीठावर उपस्थित होते.

    यावेळी सोहळा कमिटीच्या वतीने सर्व संत महंतांचे पूजन करण्यात आले.तर माऊली भक्त प्राचार्य डॉ.अशोकराव शिंदे यांच्या वतीने उपस्थित मान्यवरांचा ज्ञानेश्वरी साधक पुरस्कार देऊन गुरुवर्य भास्करगिरी बाबांच्या हस्ते  गौरविण्यात आले.

    यावेळी बोलताना गुरुवर्य भास्करगिरी महाराज पुढे म्हणाले की ग्रंथराज ज्ञानेश्वरीचे चिंतन व ज्ञानेश्वरीची पारायणे ही खरी सेवा अखंड हरिनाम सप्ताहाच्या माध्यमातून साधकाला घडत असते,ईतर ग्रंथ वाचनाने बुद्धी व चातुर्य वाढते मात्र जीवन कसे जगावं हे मनुष्याला ज्ञानेश्वरी वाचनाने कळते व ज्ञानेश्वरी वाचता वाचता तिचे ज्ञान ही कळते म्हणून जीवनात ज्ञानेश्वरीचे पारायण करा असे आवाहन त्यांनी यावेळी बोलताना केले.खंडोबा म्हाळसादेवी मंदिर देवस्थान,संत ज्ञानेश्वर महाराज देवस्थान,जैन मंदिर,संत तुकाराम महाराज मंदिर अशी या पंचक्रोशीतील देवस्थाने आपलीच असल्याने या देवस्थानाच्या उत्कर्षासाठी ही सर्वांनी योगदान द्यावे असे आवाहन त्यांनी यावेळी बोलताना केले.

       यावेळी झालेल्या कार्यक्रमाप्रसंगी नामदेव महाराज कंधारकर,बाळू महाराज कानडे, खंडोबा-म्हाळसा देवी मंदिराचे मार्गदर्शक प्रा.डॉ.मुरलीधर कराळे,प्राचार्य अशोक शिंदे,शंकर ओहोळ,रमेश ओस्तवाल,माजी सरपंच सतीश गायके,नगरसेवक राजेंद्र मापारी,व्यापारी विकास डहाळे, सोहळा कमिटीचे सदस्य भाऊसाहेब माळवे,अशोक लोखंडे,ज्ञानेश्वर काळे,बाबासाहेब कोरेकर, भानुदास गटकळ,संत सेवक शिवा राजगिरे,महेश मापारी यांच्यासह गावातील भाविक मोठ्या संख्येने उपस्थित होते.संतसेवक सुधीर चव्हाण यांनी कार्यक्रमाचे सूत्रसंचालन केले तर उपनगराध्यक्ष नंदकुमार पाटील यांनी आभार मानले.